A aparencia coma posibilidade de futuro.

No verán de 2020, Esther e Hugo atópanse en Allariz cunha fotografía rechamante, obra de Manuel Riesco e datada de 1925, baixo o título “Equipo de fútbol feminino no vello campo de Vilanova”. Nesta imaxe, doce mulleres visten, con actitude desafiante e seria, camisolas dos equipos Arnoya de Allariz e Celanova. Nun primeiro momento, a imaxe móstrase como un fito novidoso e revolucionario para a época, abrindo a porta a unha historia que deixaba moitas preguntas no proceso.

Quen eran estas mulleres?
Que foi delas?
Que sucedeu nese partido?
Atopámonos ante unhas pioneiras?

Colectivo Glovo é o proxecto artístico de Esther Latorre (Galicia) e Hugo Pereira (Portugal) que dende 2019 ten sede en Lugo. Cunha ampla traxectoria tanto estatal como internacional, a compañía continúa apaixoada pola linguaxe do movemento e persigue a investigación de novas expresións escénicas partindo do propio corpo sen límites establecidos. Ademais da súa práctica artística, a compañía tamén impulsa proxectos de xestión como o Festival Lugo en Danza e o Festival Cartografía en Movemento, ademais da plataforma artística Atopémonos bailando. Traballan a prol do tecido artístico do territorio, con especial atención á eliminación da barreira cultura invisible Galicia-Portugal.