Lava é unha compañía de danza contemporánea residente no Auditorio de Tenerife que aposta pola creación dun novo repertorio con creadores de presenza internacional e que conta coa dirección artística do bailarín tinerfeño Daniel Abreu (Premio Nacional de Danza 2014).

 

No programa dobre <Bending the walls & Beyond> recollen dúas das últimas creacións levadas a cabo coa dirección de Fernando Hernando Magadán –director artístico de NDT2– e de La Intrusa –a compañía dirixida por Virginia García e Damián Muñoz, Premio Nacional de Danza 2015–.

 

<Bending  the  Walls> de Fernando Hernando Magadán, é unha exploración sobre o mundo das restricións e limitacións na nosa procura da felicidade, a liberdade e a comprensión: os límites físicos e psicolóxicos dentro de nós mesmos e o mundo que nos rodea. É unha metáfora sobre as forzas psicolóxicas, físicas e emocionais que os humanos poden abordar para transcender a realidade palpable, superar a aflición e escapar a un mundo de imaxinación.

 

<Beyond> de La Intrusa, recolle as palabras da escritora canadiense Anne Michaels para preguntar “Que é un home sen paisaxe? Unha experiencia de procura a través de paisaxes emocionais da memoria. Un escenario de incerteza que nos obriga constantemente a crear ou reflexionar sobre o noso propio itinerario vital, sobre a paisaxe que dunha maneira consciente ou fortuíta imos construíndo”.