<O que segue>, a nova aposta da artista escénica galega Cristina Balboa, é un acto de resistencia a través da composición musical, o vídeo e a danza; un relato feroz do cotiá e as contradicións entre a arte e a vida.

​

Misturando a súa faceta de compositora musical, a súa afección por bailar nas discotecas e o seu amor polos textos demoledores, Cristina Balboa constrúe unha obra en primeira persoa para atopar un xeito intelixente de vivir a cabalo entre a escena e o mundo exterior. Unha peza que pecha as portas á ira do pasado para comenzar de novo a ritmo de techno refinado con tintes africanos. Unha onda vital que dirixe a súa enerxía cara nós.

​

<O que segue> é unha produción de Cristina Balboa en coprodución co Centro Dramático Galego que conta con Mauro Trastoy no deseño do espazo, Afonso Castro no deseño de luz ou Paula Quintas no deseño de vestiario dentro da equipa de artistas colaboradores que completa Manuel Parra na dramaturxia.